ORJEUN POTE YON NOUVO LAKOU NAN OKAP

Nan yon demach k ap pote espwa ak dinamik pou rejyon nò peyi a, yon rankont estratejik sot fèt ak plis pase 20 jèn pou prepare enplantasyon ofisyèl yon nouvo Lakou ORJEUN nan vil Okap. Inisyativ sa a vize kreye yon espas kote jèn yo pral jwenn bonjan ankadreman, fòmasyon pratik, ak zouti pou devlope pwojè k ap sèvi kominote a.

Responsab yo ki te prezan nan reyinyon an mete aksan sou enpòtans pou mete jèn yo nan kè aksyon yo. Dapre yo, Lakou ORJEUN nan Okap pral sèvi kòm yon gwo poto pou ranfòse solidarite, pataje konesans, epi ede antreprenè ak atizan lokal yo mete pi bon pwodui sou mache a.

Rankont sa a te pèmèt tou yo diskite sou lojistik enstalasyon an ak fason pou kolabore kole zepòl ak lidè lokal yo. Popilasyon ak jèn nan Okap deja akeyi nouvèl la ak anpil antouzyas, yo kanpe pare pou pote kole nan tout aktivite k ap fèt pou fè pwojè sa a yon siksè tout bon vre.